Strákarnir okkar héldu uppteknum hætti og stóðu sig frábærlega á Íslandsmóti golfklúbba með glæsilegum sigri þar. Keilir og GM léku til úrslita um Íslandsmeistaratitilinn í 1. deild karla á Garðavelli á Akranesi, Keilir hafði betur 3/2. Þetta er í 15. sinn sem Keilir fagnar sigri í þessari keppni.
Stelpurnar okkar töpuðu í æsispennandi viðureign við golfklúbb Reykjavíkur 3/2 um sigurinn.
Árangur keppnisfólks okkar á árinu hefur verið ævintýralegur, Keilir hefur sigrað í öllum mótum á þessu ári í karlaflokki, alla Íslandsmeistartitla og öll mót á Eimskipsmótaröðinni. Eina mótið sem Keilir hefur ekki sigrað í karlaflokki var háð á síðasta ári og tilheyrir mótaröðinni 2017-2018. Enn á árinu 2018 hefur Keilir einsog áður sagði sópað öllu til sín í karlaflokki.
Óskum okkar fólki innilega til hamingju með árangurinn á þessu sumri.