Mótsstjórn Hvaleyrarbikarsins hjá Golfklúbbnum Keili hefur tekið þá ákvörðun að aflýsa fyrsta keppnisdegi mótsins vegna veðurs. Ef veður leyfir verður keppt á morgun, laugardag, og á sunnudag en mótið er stigamót á mótaröð GSÍ.

Til stóð að leiknar yrðu 54 holur og er mótinu því breytt í 36 holu mót í staðinn. Fyrsti keppnisdagur átti að fara fram í dag einsog fram hefur komið.

Vonskuveður er víða um land og reyndir menn könnuðu aðstæður á Hvaleyrarvelli í morgun áður en ákvörðunin var tekin. Ekki er heldur útlit fyrir að veðrið skáni fyrr en undir kvöld samkvæmt veðurspá.

Rástímar sem lágu fyrir í dag færast yfir á morgundaginn.