Eldri kylfingar Keilis

Keilir stendur árlega fyrir vinsælli mótaröð fyrir félagsmenn 65 ára og eldri. Markmið mótaraðarinnar er að efla félagslíf eldri kylfinga, bjóða upp á skemmtilega keppni yfir sumarið og skapa vettvang fyrir góða samveru innan klúbbsins.

Mótaröðin samanstendur af sjö punktamótum sem haldin eru yfir sumartímann. Jafnframt er keppt við jafnaldra okkar í Golfklúbbi Kópavogs og Garðabæjar (GKG) í vinamótum sem leikin eru til skiptis á heimavelli og útivelli. Um er að ræða skemmtilega hefð sem hefur styrkt tengsl klúbbanna og verið einn af hápunktum sumarsins.

Mótin eru safnmót þar sem þátttakendur safna punktum eftir árangri sínum í hverju móti. Við lok tímabilsins telja fjögur bestu punktaskor hvers kylfings til úrslita í mótaröðinni. Séu tveir eða fleiri kylfingar jafnir að loknu tímabili ræður árangur í síðasta móti, síðan næstsíðasta og svo koll af kolli. Reynist allt jafnt er dregið um sætaröð.

Til að mót telji til úrslita þarf lágmarksþátttaka að vera átta kylfingar. Skráning í mótin fer fram með hefðbundnum hætti, en sérstök vinamót við GKG eru skráð í mótakerfi GolfBox.

Þátttökugjald er greitt fyrir hvert mót og rennur hluti þess til verðlauna fyrir árangur í mótaröðinni og heppni í útdrætti á lokahófi. Afreksverðlaun eru veitt í formi inneignar hjá Golfklúbbnum Keili sem nýta má til kaupa í golfverslun, veitingasölu eða til greiðslu á félagsgjöldum.

Að loknu keppnistímabili er haldið lokahóf þar sem sumarið er gert upp, verðlaun afhent og félagsmenn koma saman til að fagna góðu golfsumri í skemmtilegum félagsskap.

Starfshópur mótaraðarinnar sér um skipulag og framkvæmd hennar í samstarfi við starfsfólk Keilis. Markmiðið er að tryggja að mótaröðin sé bæði skemmtileg, sanngjörn og eftirsóknarverður þáttur í félagsstarfi eldri kylfinga hjá Keili.