Aðalfundur Keilis fór fram í gærkveldi að viðstöddum um 60 manns. Guðbjörg Erna Guðmundsdóttir var endurkjörinn formaður Keilis. Í endurkjöri til stjórnar voru Ellý Erlingsdóttir, Guðmundur Örn Óskarsson og Sveinn Sigurbergsson og hlutu þau öll kosningu enda enginn mótframboð. Fyrir í stjórn eru Daði Janusson, Bjarni Þór Gunnlaugsson og Már Sveinbjörnsson
Rekstur Golfklúbbsins Keilis gekk ágætlega á árinu 2018. Samstarfssamningur við Golfklúbb Setbergs kemur að fullu inn í uppgjörið á árinu sem sést að hluta í auknum tekjum og útgjöldum. Þónokkur samlegðaráhrif voru í þessu samstarfi og tókst að auka umsvifin án þess að það kallaði á aukna yfirbyggingu. Nýting starfskrafta og búnaðar var því góð.
Tekjur á árinu 2018 voru 242,7 mkr. samanborið við 217,8 mkr. árinu áður. Gjöld voru 219,3 mkr. samanborið við 199,9 mkr. á árinu 2017. Hagnaður fyrir afskriftir og fjármagnsliði (EBITDA) var 23,4 mkr. sem er álíka og undanfarin 5 ár að undanskildu 2017 sem skilaði aðeins 17,9 mkr.
Niðurstaða ársins er hagnaður upp á 8,0 mkr. Afskriftir voru á svipuðu róli og undanfarin ár eða um 9,3 mkr. Fjármagnskostnaður lækkaði um 2,5 mkr. milli ára sem má rekja til betri innheimtu félagsgjalda og viðskiptakrafna. Minni þörf var þess vegna á nýtingu skammtímafjármögnunar (yfirdráttar).
Hér fyrir neðan má svo nálgast kynningu á ársreikningi aðalfundar Keilis 2018, sem og ársreikninginn sjálfan.
Einnig má nálgast skýrslu stjórnar með að smella hér.